‘പഴയ ശരീരമല്ല, പുതിയ എന്നെയാണ് എനിക്കിഷ്ടം’; സൈബർ ലോകം കീഴടക്കി സമീറ റെഡ്ഡിയുടെ മാറ്റം!

ബോളിവുഡ് താരം സമീറ റെഡ്ഡി തൻ്റെ ഇൻസ്റ്റാഗ്രാം പേജിൽ പങ്കുവെച്ച ബോഡി പോസിറ്റിവിറ്റി കുറിപ്പും ചിത്രങ്ങളുമാണ് ഇപ്പോൾ മാധ്യമങ്ങളിലും സോഷ്യൽ മീഡിയയിലും ശ്രദ്ധ നേടുന്നത്. 2009-ലെയും 2026-ലെയും തൻ്റെ രണ്ട് വ്യത്യസ്ത ചിത്രങ്ങൾ ചേർത്തുവെച്ചുകൊണ്ടാണ് താരം ഈ കുറിപ്പ് പങ്കുവെച്ചിരിക്കുന്നത്. വർഷങ്ങൾക്കിപ്പുറം തൻ്റെ ശരീരത്തിലും കാഴ്ചപ്പാടിലും വന്ന വലിയ മാറ്റങ്ങളെക്കുറിച്ച് താരം ഇതിൽ തുറന്നുപറയുന്നു.

മറ്റുള്ളവരെ ബോധ്യപ്പെടുത്താനല്ല, മറിച്ച് സ്വന്തം സന്തോഷത്തിനും ആരോഗ്യത്തിനും വേണ്ടി ഫിറ്റായിരിക്കാനാണ് ഇപ്പോൾ ആഗ്രഹിക്കുന്നത്. ഗർഭധാരണത്തിന് മുൻപുള്ള ശരീരത്തിലേക്ക് തിരിച്ചുപോകാൻ താൻ ആഗ്രഹിക്കുന്നില്ലെന്നും താരം കുറിപ്പിൽ കൂട്ടിച്ചേർത്തു.
പ്രായത്തിൻ്റെ ഓരോ ഘട്ടത്തിലും മാറുന്ന ശരീരത്തിൻ്റെ പുതിയ പതിപ്പുകളെ പൂർണ്ണമായി സ്നേഹിക്കാനും സ്വീകരിക്കാനും കഴിഞ്ഞതാണ് തൻ്റെ ഇന്നത്തെ ആത്മവിശ്വാസത്തിന് കാരണമെന്ന് സമീറ പറയുന്നു.