സൂരിയുടെ ജീവിതം ഒരു സിനിമയാണ് !

ചിരിപ്പിക്കാൻ മാത്രമല്ല, കരയിക്കാനും കഴിയുന്ന നടനാണ് സൂരി എന്ന് തമിഴ് സിനിമ തിരിച്ചറിഞ്ഞിട്ട് അധികകാലമായിട്ടില്ല.മധുരയിൽ ജനിച്ച രാമലക്ഷ്മണൻ മുത്തുചാമി എന്ന സൂരി, കുടുംബത്തിന്റെ സാമ്പത്തിക ബുദ്ധിമുട്ടുകൾ കാരണം ചെറുപ്പത്തിലേ ജോലിക്കിറങ്ങേണ്ടി വന്ന ആളാണ്. 1993ൽ, വെറും 16-ാം വയസ്സിൽ, സുഹൃത്തുക്കൾക്കൊപ്പം തിരുപ്പൂരിലേക്ക് ജോലിതേടി പോയ അദ്ദേഹത്തിന് അന്ന് ലഭിച്ചിരുന്നത് ദിവസം വെറും 20 രൂപ മാത്രം. ഒരാഴ്ചത്തെ അധ്വാനത്തിന് ശേഷം കയ്യിൽ കിട്ടിയത് 140 രൂപ. അതിൽ നിന്നു പോലും വീട്ടിലേക്ക് പണം അയക്കാൻ അദ്ദേഹം ശ്രമിച്ചിരുന്നു. ഒരു തേങ്ങാ ബണ്ണ് വാങ്ങണോ വേണ്ടയോ എന്ന് ആലോചിക്കേണ്ടി വന്നത്ര ബുദ്ധിമുട്ടേറിയതായിരുന്നു ആ കാലം.

1996ൽ അഭിനയമോഹവുമായി ചെന്നൈയിലേക്ക് വണ്ടി കയറിയ സൂരിക്ക് വർഷങ്ങളോളം വേഷം ലഭിക്കാതെ അലയേണ്ടി വന്നു. ഇക്കാലത്ത് ജീവിക്കാൻ വേണ്ടി ക്ലീനറായി പോലും ജോലി ചെയ്തു അദ്ദേഹം. ചെറിയ, പേരില്ലാ വേഷങ്ങളിലൂടെ സിനിമയിൽ പിടിച്ചുനിന്ന അദ്ദേഹത്തിന് 2009ൽ പുറത്തിറങ്ങിയ ‘വെണ്ണിലാ കബഡി കുഴു’വിലൂടെയാണ് വഴിത്തിരിവുണ്ടായത്. ചിത്രത്തിലെ പ്രശസ്തമായ പൊറോട്ട തീറ്റ മത്സര രംഗം അദ്ദേഹത്തിന് ‘പൊറോട്ട സൂരി’ എന്ന വിളിപ്പേര് നൽകി.

തുടർന്നുള്ള വർഷങ്ങളിൽ ഹാസ്യനടനെന്ന നിലയിൽ തമിഴ് സിനിമയിലെ സ്ഥിരം സാന്നിധ്യമായി അദ്ദേഹം മാറി.

എന്നാൽ യഥാർഥ വഴിത്തിരിവ് വന്നത് 2023ലാണ് — വെട്രിമാരൻ സംവിധാനം ചെയ്ത ‘വിടുതലൈ പാർട്ട് 1’ലെ ഗൗരവമേറിയ കേന്ദ്രകഥാപാത്രത്തിലൂടെ. ഹാസ്യനടനിൽ നിന്ന് ഗൗരവമുള്ള നടനിലേക്കുള്ള ഈ പരിവർത്തനം വൻ നിരൂപക പ്രശംസ നേടിക്കൊടുത്തു. തുടർന്ന് ‘ഗരുഡൻ’, ‘കൊട്ടുക്കാളി’, ‘ഏഴ് കടൽ ഏഴ് മല’ തുടങ്ങിയ ചിത്രങ്ങളിലെ പ്രകടനങ്ങൾ അദ്ദേഹത്തെ കൂടുതൽ ഉയരങ്ങളിലെത്തിച്ചു. ‘കൊട്ടുക്കാളി’യും ‘ഏഴ് കടൽ ഏഴ് മല’യും ബെർലിൻ, റോട്ടർഡാം അന്താരാഷ്ട്ര ചലച്ചിത്രമേളകളിൽ പ്രദർശിപ്പിക്കപ്പെട്ടത് അദ്ദേഹത്തിന്റെ വളർച്ചയുടെ അടയാളമായി.

ദിവസക്കൂലിക്കാരനിൽ നിന്ന് ദേശീയതലത്തിൽ ശ്രദ്ധിക്കപ്പെടുന്ന നടനിലേക്കുള്ള സൂരിയുടെ യാത്ര, അധ്വാനവും സ്ഥിരോത്സാഹവും ഉണ്ടെങ്കിൽ ഏത് സാഹചര്യത്തിൽ നിന്നും ഉയർന്നുവരാമെന്നതിന്റെ തെളിവാണ്.