അറിയാം സാമന്തയുടെ ഹെല്‍ത്ത് സീക്രട്ട്

38-കാരിയായ സമന്ത റൂത്ത് പ്രഭു, തന്റെ ദിവസം ആരംഭിക്കുന്നതിന് മുന്‍പ് ആരോഗ്യത്തിന് മുന്‍ഗണന നല്‍കുന്ന ‘8-സ്റ്റെപ്പ് പവര്‍ മോണിംഗ്’ ദിനചര്യ അടുത്തിടെ പങ്കുവെച്ചിരുന്നു.

‘നിങ്ങളുടെ പ്രഭാത ദിനചര്യ ശരിയാണെങ്കില്‍, അത് ദിവസം മുഴുവന്‍ നിങ്ങളെ പോസിറ്റീവായി നിലനിര്‍ത്തുമെന്ന് ഞാന്‍ എപ്പോഴും വിശ്വസിക്കുന്നു. ഞാന്‍ പലതരം പ്രഭാത ദിനചര്യകള്‍ പരീക്ഷിച്ചിട്ടുണ്ട്, ഒടുവില്‍ എനിക്ക് അനുയോജ്യമായ ഒരു ലളിതമായ ഫോര്‍മുലയില്‍ എത്തിച്ചേര്‍ന്നു. ഇതിനെ ഞാന്‍ എന്റെ ‘പവര്‍ മോണിംഗ്’ എന്ന് വിളിക്കുന്നു. നിങ്ങള്‍ എല്ലാം ശരിയായി ചെയ്തിട്ടും വയറിലെ കൊഴുപ്പ് കുറയുന്നില്ലെങ്കില്‍, ചര്‍മ്മത്തിന് പ്രശ്‌നങ്ങളുണ്ടെങ്കില്‍, അല്ലെങ്കില്‍ രാവിലെ എഴുന്നേല്‍ക്കുമ്പോള്‍ നീര്‍വീക്കം ഉണ്ടെങ്കില്‍, പ്രഭാത ദിനചര്യ ശ്രദ്ധിക്കേണ്ട സമയമായിരിക്കുന്നു,’ എന്നാണ് സാമന്ത പറയുന്നത്.

”നിങ്ങള്‍ ഉറക്കം ഉണരുമ്പോള്‍, സ്‌ട്രെസ് ഹോര്‍മോണുകള്‍ സ്വാഭാവികമായും ഉയര്‍ന്നിരിക്കും, അത് സാധാരണമാണ്. എന്നാല്‍ അതിനുശേഷം നിങ്ങള്‍ എന്തുചെയ്യുന്നു എന്നത് വളരെ പ്രധാനമാണ്. നിങ്ങള്‍ ഫോണ്‍, വാര്‍ത്തകള്‍, ജോലി അല്ലെങ്കില്‍ ഇമെയിലുകള്‍ എന്നിവയിലേക്ക് ഉടന്‍ കടക്കുകയാണെങ്കില്‍, ആ സമ്മര്‍ദ്ദം ഇരട്ടിയാകും. നിങ്ങളുടെ മസ്തിഷ്‌കം അടുത്ത ഡോപാമൈന്‍ ഹിറ്റിനായി കാത്തിരിക്കുകയാണ്, അതുകൊണ്ടാണ് ബാക്കി ദിവസം മുഴുവന്‍ ശ്രദ്ധ കേന്ദ്രീകരിക്കാന്‍ ബുദ്ധിമുട്ട് അനുഭവപ്പെടുന്നത്,” എന്ന് തന്റെ ഇന്‍സ്റ്റാഗ്രാം പോസ്റ്റില്‍ സാമന്ത പറയുന്നു.

സാമന്ത തന്നെ സഹായിച്ച ഏറ്റവും ലളിതവും വ്യക്തവുമായ കാര്യങ്ങള്‍ ആരാധകരുമായി പങ്കിടുന്നുണ്ട്. 21 ദിവസം തുടര്‍ച്ചയായി ഇത് പരീക്ഷിച്ചു നോക്കാന്‍ താരം പറയുന്നു.

ആദ്യത്തെ ഒരു മണിക്കൂര്‍ ഫോണ്‍ ഉപയോഗിക്കരുത്.
5 മിനിറ്റ് ബോധപൂര്‍വമായ ശ്വസനവും നിശബ്ദതയും.
ഉണര്‍ന്ന ഉടന്‍ സൂര്യപ്രകാശം ഏല്‍ക്കുക.
ചെറുചൂടുള്ള വെള്ളം, നാരങ്ങ നീര്, മഞ്ഞള്‍, ആപ്പിള്‍ സിഡെര്‍ വിനഗര്‍, ആവശ്യമെങ്കില്‍ കായീന്‍ പെപ്പര്‍, അല്പം ഓര്‍ഗാനിക് ഒലിവ് ഓയില്‍ എന്നിവ ചേര്‍ത്തുണ്ടാക്കുന്ന ലളിതവും എന്നാല്‍ ഫലപ്രദവുമായ പ്രഭാത പാനീയം കുടിക്കുക.
രക്തത്തിലെ പഞ്ചസാരയുടെ അളവ് സ്ഥിരമായി നിലനിര്‍ത്താന്‍ സമീകൃതമായ പ്രഭാതഭക്ഷണം കഴിക്കുക. ഇത് ദിവസം മുഴുവന്‍ മധുരപലഹാരങ്ങള്‍ കഴിക്കാനുള്ള ആഗ്രഹം കുറയ്ക്കും.
രാവിലെ 11 മണിക്ക് മുമ്പ് ശരീരം ചലിപ്പിക്കുക (വ്യായാമം).
പ്രഭാതഭക്ഷണത്തിന് ശേഷം മാത്രം ചായയോ കാപ്പിയോ കുടിക്കുക.
നിങ്ങള്‍ പൂര്‍ത്തിയാക്കാന്‍ ആഗ്രഹിക്കുന്ന കാര്യങ്ങള്‍ (അതൊരു ചെറിയ കാര്യമാണെങ്കില്‍ പോലും) നേരത്തെ നിശ്ചയിക്കുക. അത് എഴുതി വെക്കുക.
‘ഈ 8 ഘട്ടങ്ങള്‍ ശക്തമായ ഒരു പ്രഭാത ദിനചര്യ സൃഷ്ടിക്കാന്‍ എന്നെ സഹായിച്ചു, അതാണ് ഞാന്‍ നിങ്ങളുമായി പങ്കിടുന്നത്,’ എന്നാണ് സാമന്ത പറയുന്നത്.