നിക് പ്രിയങ്കയ്ക്ക് അനുയോജ്യനാണെന്ന് ബോധ്യപ്പെട്ടതങ്ങനെ; മനസ് തുറന്ന് മധു ചോപ്ര

ബോളിവുഡ് ഏറ്റവും കൂടുതൽ ആഘോഷിക്കുന്ന ദമ്പതിമാരിൽ മുൻനിരയിൽ തന്നെയാണ് പ്രിയങ്ക ചോപ്രയും നിക്ക് ജോനാസും. സംഗീത പ്രേമികൾക്ക് ഏറെ സുപരിചിതനായ അമേരിക്കൻ ഗായകൻ നിക്കുമായുള്ള പ്രിയങ്കയുടെ പ്രണയവും വിവാഹവുമെല്ലാം ബോളിവുഡിൽ വലിയ വാർത്തയായിരുന്നു. വാടക ഗർഭധാരണത്തിലൂടെ ഇരുവരും ഒരു പെൺകുഞ്ഞിന് ജന്മം നൽകിയതും ബോളിവുഡിന്റെ ഇഷ്ട സംസാര വിഷയമായി. ഇപ്പോഴിത് ഇരുവരുടെയും അടുപ്പത്തെയും വിവാഹത്തെയുംക്കുറിച്ചെല്ലാം മനസ് തുറന്നിരിക്കുകയാണ് പ്രിയങ്കയുടെ അമ്മ മധു ചോപ്ര. 

നിക് ജൊനാസുമായുള്ള നടി പ്രിയങ്ക ചോപ്രയുടെ വിവാഹത്തിനു മുൻപ് നിക്കിനോട് ഏറെ നേരം സ്വകാര്യമായി സംസാരിച്ചെന്നും മകൾക്ക് അനുയോജ്യനായ വരനാണെന്നു മനസ്സിലായതോടെയാണ് വിവാഹത്തിനു സമ്മതിച്ചതെന്നും മധു ചോപ്ര വ്യക്തമാക്കി. “അന്നത്തെ ആ സ്വകാര്യസംഭാഷണത്തിലൂടെ എനിക്ക് നിക് എന്ന വ്യക്തിയെ കൂടുതൽ മനസ്സിലാക്കാൻ കഴിഞ്ഞു. അതുപോലൊരു ആളെയായിരുന്നു ഞാൻ എന്റെ മകൾക്കു വേണ്ടി കാത്തിരുന്നത്.”

നിക് വിദേശിയാണെന്നതോർത്ത് ഒരിക്കലും എനിക്ക് ആശങ്ക തോന്നിയിട്ടില്ലെന്ന് പറഞ്ഞ മധു പ്രിയങ്ക പഠിച്ചത് വിദേശത്താണെന്നും അവിടെ നിരവധി ബന്ധുക്കളുണ്ടെന്നും കൂട്ടിച്ചേർത്തു. കുടുംബം മുഴുവൻ അവൾക്കൊപ്പം അവിടെ താമസമാക്കിയിരുന്നു. വിദേശ സംസ്കാരത്തെക്കുറിച്ച് അവൾക്കു നന്നായി അറിയാം. നിക്കിനെ ആദ്യം കണ്ടപ്പോൾ തന്നെ കുടുംബാംഗങ്ങൾക്കെല്ലാം ഇഷ്ടമായിരുന്നു. എന്നാൽ ബാഹ്യസൗന്ദര്യം മാത്രം നോക്കി മരുമകനെ തിരഞ്ഞെടുക്കാൻ താൻ ഒരുക്കമല്ലായിരുന്നുവെന്നും മധു ചോപ്ര വെളിപ്പെടുത്തി.