Videos
ചൊറിയന്‍ സ്വഭാവമുള്ള കഥാപാത്രം; ‘പുഴു’വില്‍ പ്രേക്ഷകരെ വെറുപ്പിക്കാന്‍ മമ്മൂട്ടി വരുന്നു
പ്രേക്ഷകരെ വെറുപ്പിക്കാന്‍ മമ്മൂട്ടിയെത്തുന്നു. നവാഗതയായ രത്തീന ഷര്‍ഷാദ് സംവിധാനം ചെയ്യുന്ന പുഴുവിലാണ് നെഗറ്റീവ് ഷെയ്ഡുള്ള കഥാപാത്രത്തെ അവതരിപ്പിക്കുന്നത്. ചിത്രത്തിന്റെ ട്രെയിലര്‍ പുറത്തിറക്കി. ഈ മാസം 13 ന് ഒ.ടി.ടി. പ്ലാറ്റ്‌ഫോമായ സോണി ലിവില്‍ പുഴു റിലീസ് ചെയ്യും.
മമ്മൂട്ടിയുടെ കഥാപാത്രം എത്രത്തോളം നെഗറ്റീവ് ഷെയ്ഡുള്ളതാണെന്ന് വ്യക്തമാക്കുന്നതാണ് ട്രെയ്‌ലറിലെ ഭാഗങ്ങള്‍. ഡയലോഗ് ഡെലിവറിയില്‍ മമ്മൂട്ടി പ്രേക്ഷകരെ ഞെട്ടിക്കുന്നുണ്ട്. ടോക്‌സിക് പാരന്റിങ്ങിനെ കുറിച്ചാണ് ചിത്രം സംസാരിക്കുന്നതെന്നാണ് ട്രെയ്‌ലറില്‍ നിന്ന് വ്യക്തമാകുന്നത്.
സിന്‍ സില്‍ സെല്ലുലോയ്ഡിന്റെ ബാനറില്‍ എസ്. ജോര്‍ജ് ആണ് നിര്‍മാണം. ദുല്‍ഖര്‍ സല്‍മാന്റെ വേ ഫെറര്‍ ഫിലിംസാണ് ചിത്രത്തിന്റെ സഹനിര്‍മാണവും വിതരണവും. ‘ഉണ്ട’യ്ക്ക് ശേഷം ഹര്‍ഷാദ് ഒരുക്കുന്നതാണ് സിനിമയുടെ കഥ. വൈറസിന് ശേഷം ഷറഫ്, സുഹാസ് കൂട്ടുകെട്ട് ഹര്‍ഷാദിനൊപ്പം ചേര്‍ന്നാണ് തിരക്കഥയൊരുക്കുന്നത്. ആത്മീയ, നെടുമുടി വേണു, ഇന്ദ്രന്‍സ്, മാളവിക മോനോന്‍ തുടങ്ങി പ്രമുഖരായ ഒരു താര നിര തന്നെ പുഴുവിന്റെ ഭാഗമായി എത്തുന്നുണ്ട്. ചിത്രത്തിനു വേണ്ടി ക്യാമറ ചലിപ്പിക്കുന്നത് തേനി ഈശ്വറാണ്.
