Gossips
ഇരുവരില്‍ മോഹന്‍ലാലിനൊപ്പം അഭിനയിക്കേണ്ടിയിരുന്നത് മമ്മൂട്ടി; മെഗാസ്റ്റാര്‍ ‘നോ’ പറഞ്ഞ കഥാപാത്രം, പിന്നീട് നഷ്ടബോധം
1997 ല്‍ പുറത്തിറങ്ങിയ ‘ഇരുവര്‍’ ഇന്ത്യന്‍ സിനിമയിലെ ക്ലാസിക്കുകളില്‍ ഒന്നാണ്. മണിരത്‌നമാണ് ഇരുവര്‍ സംവിധാനം ചെയ്തത്. മോഹന്‍ലാലും പ്രകാശ് രാജും തകര്‍ത്തഭിനയിച്ച ‘ഇരുവര്‍’ വലിയ രീതിയില്‍ നിരൂപക പ്രശംസ നേടി. മോഹന്‍ലാലിന്റെ കരിയറിലെ മികച്ച വേഷങ്ങളില്‍ ഒന്നാണ് ഇരുവറിലേത്.
തമിഴ്‌നാട് രാഷ്ട്രീയമാണ് സിനിമയില്‍ പ്രതിപാദിച്ചിരിക്കുന്നത്. എംജിആര്‍, കരുണാനിധി സൗഹൃദമാണ് അതില്‍ പ്രധാനം. ഇതില്‍ എംജിആറിന്റെ കഥാപാത്രത്തെയാണ് മോഹന്‍ലാല്‍ അവിസ്മരണീയമാക്കിയത്. കരുണാനിധിയെ അവതരിപ്പിച്ചിരിക്കുന്നത് പ്രകാശ് രാജും.
Mammootty and Mohanlal
പ്രകാശ് രാജ് ചെയ്ത തമിഴ്‌സെല്‍വന്‍ എന്ന കഥാപാത്രത്തിലേക്ക് ആദ്യം കാസ്റ്റ് ചെയ്തത് മമ്മൂട്ടിയെയാണ്. എന്നാല്‍, ആ കഥാപാത്രത്തോടെ മമ്മൂട്ടി ‘നോ’ പറഞ്ഞു. മോഹന്‍ലാലിന്റെ കഥാപാത്രത്തിനു പ്രാധാന്യം കൂടിപോയതുകൊണ്ടാണ് മമ്മൂട്ടി ഇരുവരില്‍ നിന്ന് പിന്മാറിയതെന്ന് പില്‍ക്കാലത്ത് ഗോസിപ്പുകള്‍ ഉണ്ടായിരുന്നു. എന്നാല്‍, മലയാളത്തിലെ തിരക്കുകള്‍ കാരണമാണ് മെഗാസ്റ്റാര്‍ ഇരുവര്‍ വേണ്ടെന്നുവച്ചതെന്നാണ് പിന്നീട് പുറത്തുവന്ന റിപ്പോര്‍ട്ടുകള്‍.
മമ്മൂട്ടി നോ പറഞ്ഞതോടെ ഈ കഥാപാത്രവുമായി മണിരത്‌നം സമീപിച്ചത് പ്രകാശ് രാജിനെയാണ്. മോഹന്‍ലാലിനൊപ്പം കട്ടയ്ക്ക് നില്‍ക്കുന്ന പ്രകടനമായിരുന്നു ഇരുവരില്‍ പ്രകാശ് രാജിന്റേത്. ഇരുവരില്‍ അഭിനയിക്കാന്‍ സാധിക്കാത്തതില്‍ വലിയ വിഷമവും നഷ്ടബോധവും തനിക്ക് തോന്നിയിട്ടുണ്ടെന്ന് പില്‍ക്കാലത്ത് മമ്മൂട്ടി തുറന്നുപറഞ്ഞിട്ടുണ്ട്.
